ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបង្ហោះនូវរូបភាពជួបជុំកូនៗដើម្បីទទួលទានអាហារចំនួន ៤សន្លឹក ដោយថាកូនៗរបស់សម្ដេចតែងមកកំដរឪពុកម្ដាយទទួលទានអាហារជានិច្ច និងថានៅតុបាយមិនត្រូវមានរឿងមិនសប្បាយចិត្តមកនិយាយាឱ្យបានឃ្លានបាយនោះឡើយ។
សម្ដេចតេជោ ហ៊ុន សែន បានបង្ហោះនៅលើហ្វេសបុករបស់សម្ដេចនៅល្ងាចថ្ងៃទី១ ខែកញ្ញានេះដោយសរសេរថាទោះបីកូនៗរបស់សម្ដេចរវល់គ្រប់គ្នាតែមិនដែលភ្លេចមកទទួលអាហារជាមួយសម្ដេចដែរ។
សម្ដេចតេជោបានសរសេរថា៖ «អង្គប្រជុំតុបាយដោយថ្ងៃនេះកូរ៉ុម៥/៥។ កូនៗរបស់ខ្ញុំពួកគេតែងតែមកកំដរឪពុកម្តាយទទួលទានអាហារថ្ងៃត្រង់ឬពេលល្ងាច។ពួកគេដឹងច្បាស់ថាក្រៅពីពេលបាយខ្ញុំមិនមានពេលគ្រប់គ្រាន់ដើម្បីជួបគេឡើយដោយខ្ញុំក៍រវល់ពួកគេក៍រវល់។ តុបាយនេះហើយដែលកូនៗអាចសួរនាំខ្ញុំឬខ្ញុំសួរនាំកូនៗឬនិយាយមួយបែបគឺពិភាក្សាការងារតែមិនយករឿងមិនសប្បាយចិត្តបាត់ឃ្លានបាយមកនិយាយនោះឡើយ»។
នាយករដ្ឋមន្ត្រីកម្ពុជា សម្ដេចតេជោ ហ៊ុន សែន មានបុត្រានិងបុត្រីចំនួន ៥នាក់គឺ លោក ហ៊ុន ម៉ាណែត លោកស្រី ហ៊ុន ម៉ាណា លោក ហ៊ុន ម៉ានិត លោក ហ៊ុន ម៉ានី និងលោកស្រី ហ៊ុន ម៉ាលី៕
