ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុនសែន បានចោទសួរអ្នកវិភាគមួយចំនួនទៅលើការទទួលស្វាគមន៍លោក ហ៊ុន ម៉ាណែត ដោយប្រទេសជាមិត្ត។ ដែលសម្ដេចថាមានការទទួលស្វាគមន៍ច្រើនសណ្ឋានដែលជាការផ្ដល់កិត្តិយសដល់លោក ហ៊ុន ម៉ាណែត។

សម្ដេចតេជោបានលើកឡើងក្នុងហ្វេសបុកសម្ដេចថា៖ «ហ៊ុន ម៉ាណែតទើបបញ្ចប់ទស្សនកិច្ចនៅឡាវដែលទទួលត្រួតពលដោយនាយអគ្គសេនាធិការកងទ័ពឡាវ។ ក្រៅពីនេះហ៊ុន ម៉ាណែតត្រូវបានទទួលដោយឧបនាយករដ្ឋមន្ត្រីនិងជារដ្ឋមន្ត្រីក្រសួងការពារជាតិ នាយករដ្ឋមន្ត្រីនិងដោយប្រធានាធិបតីឡាវថែមទៀត។ តើអស់លោកអ្នកវិភាគយល់យ៉ាងណាដែរក្នុងទស្សនកិច្ចហ៊ុន ម៉ាណែតទៅឡាវលើកនេះ?»

ជាងនេះទៅទៀតសម្ដេចក៏រម្លឹកពីដំណើរទស្សនកិច្ចរបស់លោក ហ៊ុន ម៉ាណែត នៅប្រទេសជប៉ុនកាលពីកន្លងទៅផងដែរថា៖ «ដោយលើកមុនខ្ញុំមិនបានជំរាបអស់ខ្ញុំសូមជំរាបបន្ថែមថាកាលពី ហ៊ុន ម៉ាណែត ទស្សនកិច្ចនៅជប៉ុននាដើមឆ្នាំ២០២២នេះមិត្តជប៉ុនរបស់យើងបានបញ្ជូនយន្តហោះមកទទួល ហ៊ុន ម៉ាណែត ពីកម្ពុជាទៅជប៉ុននិងជូនពីជប៉ុនមកដល់កម្ពុជាវិញព្រោះពេលនោះគ្មានជើងហោះហើរទេដោយសារកូវីដ១៩»។

សម្ដេចតេជោបានចោទសួរថា តើអ្នកវិភាគមានយោបល់យ៉ាងណាដែរព្រោះសម្ដេចចង់ដឹង។នេះមិនមែនជាពាក្យចាក់ដោតទេតែជាការចង់យល់តែប៉ុណ្ណោះ៕