(ខេត្តកណ្តាល) ៖​ ស្នងការនគរបាលខេត្តកណ្តាល លោក ឈឿន សុចិត្រ បានរៀបចំម៉ូតូនិងគ្រឿងឧបករណ៍បំពងសម្លេងជាច្រើនគ្រឿង ព្រមទាំងបដាអនុសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ដើម្បីចេញទៅផ្សព្វផ្សាយជូនប្រជាពលរដ្ឋទូទាំងក្រុងតាខ្មៅ ឱ្យយល់ដឹងពីហានិភ័យនៃការចម្លងមេរោគកូវីដ១៩ ពិសេសអនុវត្តនូវសេចក្តីសម្រេចនានារបស់រាជរដ្ឋាភិបាល ពិេសេសេចក្តីណែនាំរបស់រាជរដ្ឋាភិបាលស្តីពីវិធានការលម្អិតដើម្បីរិតបន្តឹងការអនុវត្តសេចក្តីសម្រេចស្តីពីការបិទខ្ទប់ភូមិសាស្ត្ររាជធានីភ្នំេពញ និងក្រុងតាខ្មៅនៃខេត្តកណ្តាលដើម្បីទប់ស្កាត់ការឆ្លងរាលដាលនៃជំងឺកូវដ-១៩។ នេះបើតាមលោកស្នងការវ័យក្មេង លោក ឈឿន សុចិត្រ  បានប្រាប់មកក្រុងការងារ E-ARTS នៅរសៀលថ្ងៃទី២០ ខែមេសា ឆ្នាំ២០២១នេះ។

លោកស្នងការខេត្តកណ្តាល បានបញ្ជាក់បន្ថែមទៀតថា បច្ចុប្បន្ននេះក្រុងតាខ្មៅបានរកឃើញនូវអ្នកវិជ្ជមានកូវីដ-១៩ជាច្រើននាក់ រហូតដល់រាជរដ្ឋាភិបាលសម្រេចបិទទីក្រុងតាខ្មៅតែម្តង ក្នុងគោលបំណងដើម្បីកាត់ផ្តាច់ការចម្លងមេរោគដ៏សាហាវនេះ។ លោក ឈឿន សុចិត្រ បានបន្ថែមទៀតថា ការចេញផ្សព្វផ្សាយបទបញ្ជារបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងការរីករាលដាលនៃជំងឺកូវីដ-១៩ ជាពិសេសផ្សព្វផ្សាយនូវសាររបស់សម្តេចតេជោ នាយករដ្ឋមន្ត្រី និងបទបញ្ជារបស់គណៈបញ្ជាការឯកភាពខេត្តជូនប្រជាពលរដ្ឋនៅពេលនេះគឺមានសារៈសំខាន់ណាស់ដើម្បីឱ្យប្រជាពលទូទាំងក្រុងតាខ្មៅនៅផ្ទះ កុំចេញដើរក្រៅ ហាមការជួបជុំ ពិេសសចូលរួមអនុវត្តកុំឱ្យខុសពីសេចក្តីណែនាំរបស់រាជរដ្ឋាភិបាលកម្ពុជា។

ស្នងការនគរបាលខេត្តកណ្តាល លោក ឈឿន សុចិត្រ បានអំពាវនាវដល់ប្រជាពលរដ្ឋក្នុងខេត្តកណ្តាល ពិសេសក្រុងតាខ្មៅសូមចូលរួមជាមួយរាជរដ្ឋាភិបាលអនុវត្ត ៣កុំ និង ៣ការពារ ដើម្បីចៀសឆ្ងាយពីការឆ្លងកូវីដ-១៩។ លោក ឈឿន សុចិត្រ ក៏បានលើកទឹកចិត្តឱ្យប្រជាពលរដ្ឋដែលដល់ពេលត្រូវចាក់វ៉ាក់សាំងលើកទី២ ទៅទទួលការចាក់វ៉ាក់សាំងតាមទីកន្លែងដែលក្រសួងសុខាភិបាលបានកំណត់ និងហាមផ្តាច់ធ្វើដំណើរឆ្លងក្រុង-ស្រុកក្នុងខេត្តកណ្តាល៕