ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានសម្រេចឱ្យសាងសង់ស្ពានអាកាស ២ទីតាំងបន្ថែម ដើម្បីដោះស្រាយបញ្ហាកកស្ទះនៅរាជធានីភ្នំពេញ។
យោងតាមការចុះផ្សាយរបស់មន្ទីរសាធារណការរាជធានីភ្នំពេញ ស្ពានអាកាសថ្មីទាំង២ទីតាំងនេះមាន ១នៅទីតាំងប្រសព្វរវាងមហាវិថីសម្តេចអគ្គមហាសេនាបតីតេជោ ហ៊ុន សែន មហាវិថី ព្រះមុនី្នវង្ស និងវិថីកងយោធពលខេមរភូមិន្ទ (ផ្លូវលេខ ២៧១) និងមួយទីតាំងទៀតនៅស្ដុបស៊ិនជូរីប្លាស្សា ប្រសព្វរវាងមហាវិថីសហព័ន្ឋរុស្ស៊ី មហាវិថីសម្តេចចៅហ្វាវាំងវរវៀងជ័យអធិបតីស្រឹង្គារ គង់ សំអុល (ផ្លូវលេខ ២០០៤) និងផ្លូវលេខ ២០១១។
បច្ចុប្បន្នរាជធានីភ្នំពេញមានស្ពានអាកាសចំនួន៥ ហើយគឺស្ពានអាកាស និងផ្លូវក្រោមដីចោមចៅ ស្ពានអាកាសក្បាលថ្នល់ ស្ពានអាកាស ៧មករា ស្ពានអាកាស ៥មករា និងស្ពានអាកាសស្ទឹងមានជ័យ ខណៈគម្រោងទី៦ កំពុងសាងសង់នៅក្នុងខណ្ឌឬស្សីកែវ៕