សៀមរាប៖ អាជ្ញាធរអប្សរា និងគណៈប្រតិភូពីប្រទេសណូវែលហ្សឡង់ បានជួបពិភាក្សានិងសិក្សាលើការគ្រប់គ្រងធនធានធម្មជាតិក្នុងតំបន់អង្គរ កាលពីថ្ងៃទី៤ ដល់១២ ខែសីហា ឆ្នាំ២០២២ ដើម្បីបន្តកិច្ចសហការលើគម្រោងក្នុងដំណាក់កាលក្រោយវិបត្តិកូវីដ-១៩។
បើតាមការចុះផ្សាយរបស់ក្រសួងវប្បធម៌គម្រោងនេះមានសារៈប្រយោជន៍ជួយឱ្យការគ្រប់គ្រងប្រព័ន្ធធារាសាស្រ្តសម័យបុរាណកាន់តែមានប្រសិទ្ធិភាពដើម្បីបញ្ចៀសទឹកជំនន់ក្នុងតំបន់សៀមរាប-អង្គរ ការទាញអត្ថប្រយោជន៍ពីធនធានធម្មជាតិដើម្បីអភិវឌ្ឍន៍សហគមន៍ និងការកសាងសមត្ថភាពនិងធនធានមនុស្សជាដើម។
គួរឱ្យដឹងផងដែរថា រហូតមកដល់ពេលនេះ ណូវែលហ្សេឡង់បានជួយគាំទ្រដល់ការអនុវត្តគម្រោងចំនួន ៣ដំណាក់កាលរួចមកហើយ តាំងពីឆ្នាំ២០១៩មក ដែលរួមមានគម្រោងគ្រប់គ្រងធនធានធម្មជាតិក្នុងតំបន់អង្គរ ដោយមានការចូលរួមពីសហគមន៍ ដំណាក់កាលទី១ និងដំណាក់កាលទី២ ពីឆ្នាំ២០០៩ ដល់២០១៣ និង គម្រោងគម្រោងអភិវឌ្ឍន៍សេដ្ឋកិច្ចសហគមន៍ និងបេតិកភណ្ឌអង្គរពីឆ្នាំ២០១៤ ដល់ឆ្នាំ២០១៩៕
