បន្ទាយមានជ័យ៖ ផ្ទាំងចម្លាក់រូបព្រះលោកេស្វរៈដែលមានអាយុកាល១០០០ឆ្នាំដែលបាត់អំឡុងឆ្នាំ១៩៩៨ ពេលនេះត្រូវបានដង្ហែរពីសារមនី្ទរជាតិរាជធានីភ្នំពេញ មកដល់ទីតាំងដើមក្នុងប្រាសាទបន្ទាយឆ្មារ ស្រុកថ្មពួក ខេត្តបន្ទាយមានជ័យ កាលពីថ្ងៃទី៣០ ខែកក្កដា។

ក្នុងពិធីដង្ហែរផ្ទាំងចម្លាក់រូបព្រះលោកេស្វរៈនោះដែរក៏មានការអញ្ជើញចូលរួមដង្ហែរពីអ្នកមុខអ្នកការ មន្ត្រីជាន់ខ្ពស់ក្រសួងវប្បធម៌ និងប្រជាពលរដ្ឋ សិស្សានុសិស្សជាច្រើនកុះករ។

ប្រធានសហគមន៍ទេសចរណ៍បន្ទាយឆ្មារ លោក ម៉ៅ ស៊ី បានប្រាប់ឱ្យភ្នាក់ងារ EAC News ប្រចាំខេត្តបន្ទាយមានជ័យ ដឹងថាផ្ទាំងចម្លាក់រូបព្រះលោកេស្វរៈទាំងអស់សរុប៨ផ្ទាំង៨រូបតែមកដល់បច្ចុប្បន្ននេះក្រោយពីយើងយកចេញពីសារមន្ទីរជាតិ២រូបមកដាក់នៅទីតាំងដើមនៅជញ្ជាំងប្រាសាទបន្ទាយឆ្មារខាងលិច ឈៀងផ្នែកខាងត្បូងគឺមានចំនួនតែ៦រូបទេ ដោយដែលមិនទាន់រកឃើញ។

ប្រធានមន្ទីរវប្បធម៌និងវិចិត្រសិល្បៈខេត្តបន្ទាយមានជ័យ លោក យ៉ង់ តាំងកួយ បានបញ្ជាក់ឱ្យ EAC News ដឹងថាផ្ទាំងចម្លាក់រូបព្រះលោកេស្វរៈត្រូវបានកសាងឡើងពីចុងសតវត្សទី១២ដើមសតវត្សទី១៣។

លោកបានបញ្ជាក់ថា៖ «ផ្ទាំងចម្លាក់រូបព្រះលោកេស្វរៈត្រូវបានបាត់ក្នុងអំឡុងឆ្នាំ១៩៩៨ ដោយត្រូវជនទុច្ចរិតលួចគាស់រត់ពន្ធយកទៅលក់នៅប្រទេសថៃ។ ហើយនៅឆ្នាំ២០០០ រាជរដ្ឋាភិបាលថៃបានរកឃើញហើយប្រគល់ជូនរាជរដ្ឋាភិបាលកម្ពុជាវិញដាក់តម្កល់នៅសារៈមន្ទីរជាតិ-ភ្នំពេញរហូតមក។ តែដោយមានការជួយជ្រុំជ្រែងពីលោកឧបនាយករដ្ឋមន្ត្រី កែ គឹមយ៉ាន និងលោកស្រីក៏បានស្នើសុំផ្ទាំងចម្លាក់រូបព្រះលោកេស្វរៈមកដាក់នៅកន្លែងដើមវិញ»៕