ភ្នំពេញ៖ ក្រសួងសុខាភិបាលបានច្រានចោលព័ត៌មានដែលថាមានស្ត្រីមានផ្ទៃពោះម្នាក់នៅខេត្តសៀមរាបបានឆ្លងនូវជំងឹអុតស្វា។
ក្នុងសេចក្ដីប្រកាសព័ត៌មានចុះថ្ងៃពុធ ទី២៧ ខែកក្កដានេះ ក្រសួងសុខាភិបាលបានឱ្យដឹងថា ក្រោយមានព័ត៌មានដែលថាស្ត្រីមានផ្ទៃពោះ ៨ខែ អាយុ ២៣ឆ្នាំ រស់នៅសង្កាត់ស្លក្រាម ខេត្តសៀមរាប សង្ស័យមានផ្ទុកជំងឺអុតស្វា ក្រុមការងារក្រសួងបានចុះសាកសួរពិនិត្យ ស្ថានភាពអ្នកជំងឺផ្ទាល់ និងបានយកវត្ថុសំណាករបស់អ្នកជំងឺ នៅថ្ងៃទី២៦ ខែកក្កដា ឆ្នាំ២០២២ ដើម្បីយកទៅពិនិត្យវិភាគនៅមន្ទីរពិសោធន៍ប៉ាស្ទ័រកម្ពុជា ដោយទទួលបានលទ្ធផល«អវិជ្ជមានវីរុសអុតស្វា» នៅថ្ងៃទី២៧ ខែកក្កដានេះ។
ក្រសួងសុខាភិបាលបញ្ជាក់ថា៖ «ក្រសួងសុខាភិបាលនៃព្រះរាជាណាចក្រកម្ពុជា សូមច្រានចោលទាំងស្រុងនូវការផ្សព្វផ្សាយព័ត៌មាន មិនពិតថា មានស្ត្រីផ្ទៃពោះម្នាក់នៅខេត្តសៀមរាបមានកើតជំងឺអុតស្វា»។
បើតាមក្រសួងសុខាភិបាលបច្ចុប្បន្នស្ត្រីខាងលើមានស្ថានភាពវិវត្តន៍ទៅរកការធូរស្រាលជាបណ្តើរៗ ក្រោមការជួយពិនិត្យ តាមដាន និងព្យាបាលជំងឺនេះជូនគាត់ដោយក្រុមគ្រូពេទ្យនៃមន្ទីរពេទ្យខេត្តសៀមរាប៕