បន្ទាយមានជ័យ៖ យោងតាមរបាយការណ៍របស់មជ្ឈមណ្ឌលសំចតប៉ោយប៉ែតស្តីពីពលករវិលត្រឡប់ពីប្រទេសថៃចូលមកកម្ពុជាវិញនៅឆមាសទី១ ឆ្នាំ២០២២ ឱ្យដឹងថា ប្រទេសថៃបានបញ្ជូនពលករខ្មែរឱ្យត្រលប់មកកម្ពុជាវិញចំនួន ៧៤ ១៤៨នាក់ ក្នុងនោះបុរស ៣០ ៤៥៩នាក់ ស្ត្រី ៣០ ២៩៨នាក់ កុមារា ៩ ០៧៧នាក់ និងកុមារី ៤ ៣១៤នាក់។
របាយការណ៍ឱ្យដឹងទៀតថាក្នុងចំណោម ពលករ-ពលការិនីកម្ពុជាដែលបានបញ្ជូនមកពីប្រទេសថៃទាំង ៧៤ ១៤៨នាក់ ក្នុងនោះរួមមានបញ្ជូនតាមច្រកអូរបីជាន់ចំនួន ៣៧ ៣២៣នាក់ ច្រកម៉ាឡៃ ៩ ៥១២នាក់ ច្រកបឹងត្រកួន ១ ៩៧០នាក់ និងច្រកប៉ោយប៉ែត ២៥ ៤៤៣នាក់។
អគ្គនាយកនៃមូលនិធិជាតិជំនួយសង្គម លោក ឈួរ សុបញ្ញា អំពាវនាវដល់អាជ្ញាធរមូលដ្ឋាន សមត្ថកិច្ចពាក់ព័ន្ធ និងអង្គការដៃគូនានាបន្តចូលរួមសហការផ្តល់សេវានានាចាំបាច់ដល់ក្រុមគ្រួសារជនចំណាកស្រុក ជាពិសេសពលករចំណាកស្រុកទៅប្រទេសថៃដែលមិនមានសុវត្ថិភាពដើម្បីចូលរួមការពារទប់ស្កាត់ ការលួចឆ្លងដែនដោយខុសច្បាប់ពីសំណាកពលរដ្ឋ ។
លោកបានលើកឡើងថា៖ «បច្ចុប្បន្ននេះពលរដ្ឋបានធ្វើចំណាកស្រុក ដោយខុសច្បាប់មានជាបន្តបន្ទាប់ដោយសារតែមានការអូសទាញពីសំណាកមេខ្យល់នាំទៅប្រទេសថៃ ដើម្បីស្វែងរកការងារធ្វើជាមួយគ្នាក៏បានភាគីថៃបញ្ជូនត្រលប់មកកម្ពុជាវិញជាបន្តបន្ទាប់ផងដែរ»។
ព្រមជាមួយគ្នានោះលោកក៏បានជំរុញគ្រប់អ្នកពាក់ព័ន្ធ អង្គការដៃគូបន្តរួមសហការគ្នាអប់រំផ្សព្វផ្សាយដល់ពលរដ្ឋឱ្យបានយល់ច្បាស់ពីហានិភ័យនៃការឆ្លងដែនដោយខុសច្បាប់ផងដែរ៕
