សិង្ហបុរី៖ គ្លីនិកថែទាំសុខភាពឯកជនចំនួន ២៤កន្លែងនៅប្រទេសសិង្ហបុរី ត្រូវបានជ្រើសរើសដើម្បីចុះបញ្ជីជាទីតាំងដែលអាចផ្តល់សេវាចាក់វ៉ាក់សាំងកូវីដ-១៩ស្របច្បាប់ទៅកាន់ប្រជាពលរដ្ឋសិង្ហបុរីបាន។ នេះបើយោងតាមការប្រកាសរបស់រដ្ឋមន្រ្តីសុខាភិបាលសិង្ហបុរីកាលពីថ្ងៃពុធម្សិលមិញនេះ។

តាមរយៈការផ្តល់លក្ខខណ្ឌពិសេសនេះ គ្លីនិកឯកជនដែលត្រូវបានផ្តល់សិទ្ធិចំនួន ២៤កន្លែងនោះ អាចធ្វើការផ្តល់នូវវ៉ាក់សាំងប្រភេទ Sinovac ដែលមាននៅក្នុងស្តុករបស់ក្រសួងសុខាភិបាលសិង្ហបុរី និងធ្វើការចាក់ជូនទៅកាន់ប្រជាពលរដ្ឋសិង្ហបុរីដែលមានទីលំនៅច្បាស់លាស់ក្នុងប្រទេស និងអ្នកដែលមានលិខិតអនុញ្ញាតឱ្យស្នាក់នៅក្នុងរយៈពេលវែង។ ចំពោះតម្លៃវិញត្រូវបានគេដឹងថា ស្ថិតក្នុងចន្លោះ ១០ដុល្លារសិង្ហបុរី ទៅ២៥ដុល្លារសិង្ហបុរីក្នុងមួយដូស។ 

ក្រសួងសុខាភិបាលសិង្ហបុរីក៏បានបញ្ជាក់ដែរថា មែនទែនទៅមានការស្នើសុំចុះបញ្ជីដើម្បីផ្តល់វ៉ាក់សាំងជាលក្ខណៈឯកជននេះច្រើន ប៉ុន្តែអាជ្ញាធរសុខាភិបាលបានពិនិត្យ និងផ្តល់ការអនុញ្ញាតទៅលើពាក្យស្នើសុំទាំងនោះអាស្រ័យទៅលើសមត្ថភាពក្នុងការអនុវត្តការផ្តល់វ៉ាក់សាំងនេះដែលធានាទៅដោយសុវត្ថិភាព, បានត្រឹមត្រូវ និងធានានូវប្រសិទ្ធិភាពរបស់វ៉ាក់សាំង។ ក្រៅពីចំណុចសំខាន់ៗទាំងបីនេះ ក្រសួងក៏បានពិចារណាទៅលើថ្លៃរដ្ឋបាលសម្រាប់ការចាក់វ៉ាក់សាំងម្តងៗ បទពិសោធន៍ កេរ្តិ៍ឈ្មោះរបស់ទីតាំងដែលបានស្នើ តាមរយៈការពិនិត្យប្រវត្តិ និងអាជ្ញាបណ្ណរបស់ទីតាំងនោះកន្លងមក៕