(កំពង់ឆ្នាំង) ÷ អនុប្រធានទី១ អាជ្ញាធរមីន លោកទេសរដ្ឋមន្រ្តី លី ធុជ រួមសហការជាមួយ ស្ថានទូតឥណ្ឌាប្រចាំនៅកម្ពុជា, មូលនិធិ Sir Bobby Charlton, មូលនិធិ Prince និងសភាពាណិជ្ចកម្មអាមេរិកប្រចាំនៅកម្ពុជា បានអញ្ជើញទស្សនកិច្ចស្វែងយល់អំពីសកម្មភាពហ្វឹកហ្វឺនការងារបោសសម្អាតមីន និងសុនខរាវមីន នៅវិទ្យាស្ថានបច្ចេកទេសសកម្មភាពមីនរបស់ស៊ីម៉ាក់ ក្នុងខេត្តកំពង់ឆ្នាំង។

ដំណើរទស្សនកិច្ចនៅ ថ្ងៃទី០៥ ខែកក្កដា ឆ្នាំនេះស្ថិនក្រោមកម្មវិធី "ឥទ្ធិពលស្រ្តីក្នុងវិស័យសកម្មភាពមីន" លោកទេសរដ្ឋមន្រ្តីបានវាយតម្លៃខ្ពស់សកម្មភាពហ្វឹកហ្វឺន សមត្ថភាព ជំនាញ និងបច្ចេកទេសរបស់អ្នកដោះមីន ដែលទទួលបានមកពីវិទ្យាស្ថាននេះ។

លោកទេសរដ្ឋមន្រ្តី លី ធុជ បានលើកឡើងថា ស៊ីម៉ាក់ គឺជាមជ្ឈមណ្ឌលបោសសម្អាតមីនជាតិដ៏លេចធ្លោមួយ និងមានសមត្ថភាពខ្ពស់ ព្រមទាំងបានចូលរួមរំដោះផ្ទៃដីពីការគម្រាមកំហែងដោយសារមីន និងសំណល់ជាតិផ្ទុះពីសង្រ្គាមច្រើនជាងគេនៅកម្ពុជា។

ទេសរដ្ឋមន្រ្តី បានបញ្ជាក់ថា សម្តេចតេជោ ហ៊ុន សែន នាយករដ្ឋមន្រ្តី តែងតែយកចិត្តទុកដាក់ខ្ពស់ដល់សុវត្ថិភាព និងត្រូវបោសសម្អាតមីនឲ្យអស់ពីកម្ពុជា ដើម្បីផ្តល់នូវស្នាមញញឹមជូនប្រជាពលរដ្ឋ។

លោកបន្តទៀតថា ថ្មីៗនេះ សម្តេចតេជោ បានផ្តល់បេសកកម្មឲ្យអាជ្ញាធរមីន ដឹកនាំនិងរៀបចំវិស័យសកម្មភាពមីនជាមួយប្រតិបត្តិករជាតិដើម្បីរៀបចំផែនការ និងដាក់ពង្រាយកម្លាំងបោសសម្អាតមីន ក្រោម “គម្រោងសម្តេចតេជោសម្រាប់សកម្មភាពមីន” ដំណាក់កាលដំបូង ក្នុងនោះត្រូវការជាចំបាច់នូវកម្លាំងមជ្ឈមណ្ឌលសកម្មភាពកំចាត់មីនកម្ពុជា ចូលរួមផងដែរ ដែលត្រូវអនុវត្តតាមស្តង់់ដាសកម្មភាពកំចាត់មីនកម្ពុជា៕