ភ្នំពេញ៖ ក្រសួងធនធានទឹក និងឧតុនិយមបានព្រមានពីស្ថានភាពភ្លៀងធ្លាក់នៅកម្ពុជាដែលមានពីតិច ទៅច្រើន លាយឡំនឹងផ្គរ រន្ទះ និងខ្យល់កន្ត្រាក់នៅក្នុងប្រទេសកម្ពុជាដែលថាជាឥទ្ធិបពលដែលកើតចេញពីព្យុះទី៣នៅសមុទ្រចិនខាងត្បូង។

ក្នុងសេចក្ដីជូនដំណឹងចុះថ្ងៃទី២៨ ខែមិថុនា ឆ្នាំ២០២២ ក្រសួងធនធានទឹក និងឧតុនិយម បានឱ្យដឹងថាចាប់ពីថ្ងៃទី២៩ ខែមិថុនា រហូតដល់ថ្ងៃទី៥ ខែកក្កដា ឆ្នាំ២០២២ កម្ពុជានឹងទទួលរងឥទ្ធិពលពីជ្រលងនៃប្រព័ន្ធសម្ពាធទាបដែលអូសបន្លាយលើភាគខាងជើង ប្រទេសថៃ ឡាវ និងវៀតណាម ដោយភ្ជាប់ទៅនឹងសម្ពាធមួយនៅសមុទ្រចិនខាងត្បូង។

ក្រសួងបញ្ជាក់ថា៖ «សម្ពាធនេះនឹងវិវត្តខ្លួនជាបន្តបន្ទាប់ទៅជាព្យុះទី៣ ដោយមានដំណើរឆ្ពោះទៅកាន់កោះហៃណាំ»។

ស្ថានភាពនេះនឹងធ្វើឱ្យខេត្តនានានៅកម្ពុជាមានសីតុណ្ហភាពពី២៤ ដល់ ៣៦អង្សារសេ រួមទាំងមានភ្លៀងពីតិចទៅច្រើន នឹងមានបង្កផ្គរ រន្ទះ និងខ្យល់កន្ដ្រាក់តាមតំបន់ខ្លះផងដែរ៕