ភ្នំពេញ៖ ព្រះមហាក្សត្រនៃព្រះរាជាណាចក្រកម្ពុជា សម្ដេចព្រះបរមនាថ នរោត្តម សីហមុនី បានត្រាស់បង្គាប់តែងតាំងលោក សំហេង បុរស ជារដ្ឋមន្ត្រីប្រតិភូអមនាយករដ្ឋមន្ត្រីបន្ថែមលើមុខងារបច្ចុប្បន្ន។

ក្នុងរាជក្រឹត្យឡាយព្រះហស្ថលេខាថ្ងៃទី១៤ ខែមិថុនា សម្ដេចព្រះបរមនាថ នរោត្តម សីហមុនី បានសម្រេចដោយទ្រង់យល់សេចក្ដីក្រាបបង្គំទូលថ្វាយរបស់នាយករដ្ឋមន្ត្រីកម្ពុជា សម្ដេចតេជោ ហ៊ុន សែន និងបានបង្គាប់ឱ្យសម្ដេចតេជោ ទទួលបន្ទុកអនុវត្តព្រះរាជក្រឹត្យនេះ ចាប់ពីថ្ងៃឡាយព្រះហស្ថលេខាតទៅ។

បច្ចុប្បន្នលោក សំហេង បុរស ជាគឺរដ្ឋលេខាធិការក្រសួងសង្គមកិច្ច អតីតយុទ្ធជន និង យុវនីតិសម្បទា កាលពីឆ្នាំ២០២១លោកត្រូវបានសកលវិទ្យាល័យ Charles Sturt នៃប្រទេសអូស្ត្រាលីផ្ដល់ពានរង្វាន់ជាអតីតនិស្សិតឆ្នើម ដោយសារសកម្មភាពរបស់លោកក្នុងឋានៈជារដ្ឋលេខាធិការក្រសួងបានជួយដល់ជីវិតរបស់ប្រជាពលរដ្ឋជាច្រើននាក់ក្នុងប្រទេសកម្ពុជា តាមរយៈកម្មវិធីជាច្រើនរបស់រដ្ឋាភិបាលដែលលោកបានផ្តួចផ្តើមគំនិត៕