ភ្នំពេញ៖ អគ្គនាយកនៃរដ្ឋាករទឹកស្វយ័តក្រុងភ្នំពេញ លោក ឡុង ណារ៉ូ បានឱ្យដឹងថារដ្ឋាករទឹកបានស្នើរសុំទៅភាគីជប៉ុនហើយឱ្យដាក់បញ្ចូលតំបន់ពីរទៀតចូលទៅក្នុងផែនការមេទឹកស្អាតរាជធានីភ្នំពេញ ខណៈតំបន់នោះជាតំបន់អភិវឌ្ឍន៍ខ្លាំង។

ថ្លែងនៅក្នុងសន្និសីទសារព័ត៌មាន ស្ដីពី “បច្ចុប្បន្នភាព ក្នុងការផ្គត់ផ្គង់ទឹកស្អាតនៅភូមិសាស្ត្ររាជធានីភ្នំពេញ” លោក ឡុង ណារ៉ូ បានឱ្យដឹងថាបច្ចុប្បន្នការផ្គតផ្គង់ទឹកស្អាតនៅភ្នំពេញមិនទាន់ឆ្លើយតបនឹងតម្រូវការនៅឡើយទេខណៈនៅក្នុងឆ្នាំ២០៣០ បរិមាណតម្រូវទឹកប្រើប្រាស់ជាមធ្យមអាចនឹងកើនឡើងដល់ ១លាន ៥សែនម៉ែត្រគីបក្នុងមួយថ្ងៃ ដែលដាច់ខាតត្រូវតែផលិតសាងសង់រោងចក្រ តាមការសិក្សាធ្វើយ៉ាងណាឱ្យដល់ការធានាការផ្គត់ផ្គង់ ១លាន ៨សែនម៉ែត្រគីប ទើបអាចទប់នឹងពេលខ្លះដែលខ្វះខាតបាន។ លោកបានស្នើដល់ដៃគូរអភិវឌ្ឍន៍ដែលមានប្រទេសជប៉ុនឱ្យដាក់តំបន់ព្រលានយន្តហោះថ្មីក្រុងតាខ្មៅ និងតំបន់អរិយក្សត្រទៅក្នុងផែនការមេអភិវឌ្ឍន៍ទឹកស្អាត។

លោកថា៖ «តំបន់ពីរទៀតគឺតំបន់ព្រលានយន្តហោះថ្មី ដែលនៅទីក្រុងតាខ្មៅ និងតំបន់អរិយក្សត្រដែលគិតថា ថ្ងៃក្រោយនឹងក្លាយទៅជាតំបន់អភិវឌ្ឍន៍មួយដ៍ធំនោះ រូបខ្ញុំបាទបានស្នើរសុំភាគីជប៉ុនបញ្ជូលទីតាំងទាំងពីរនេះ ស្ថិតនៅក្នុងផែនការមេរបស់រដ្ឋាករទឹកស្វយ័តក្រុងភ្នំពេញដែរ គឹមានតំបន់ខាងត្បូងទីក្រុងតាខ្មៅជាតំបន់ព្រលានយន្តហោះថ្មីនេះ និងតំបន់ខ្សាច់កណ្តាលដែលជាតំបន់ទល់មុខជ្រោយចង្វា»។

រដ្ឋាករទឹកស្អាតរាជធានីភ្នំពេញធ្លាប់បញ្ជាក់ថា ភ្នំពេញមានបញ្ហាខ្វះខាតលើការផ្គត់ផ្គង់ទឹកដែលបូមពីទន្លេមកផ្ទៃអាងស្តុកប្រមាណ ១ ០០០ទៅ ២ ០០០ម៉ែត្រគូបក្នុងមួយម៉ោង ឬស្មើប្រមាណ ២៤ ០០០ម៉ែត្រគូប ទៅ៤៨ ០០០ ម៉ែត្រគូប ក្នុងមួយថ្ងៃ។ លោក ឡុង ណារ៉ូ ថាបញ្ហាចោទនេះទាមទារឱ្យមានការបំពេញនូវសេចក្ដីត្រូវការ ខណៈពលរដ្ឋចូលមករស់នៅទីក្រុងកាន់តែច្រើនហើយនីវ៉ូទឹកទន្លេមេគង្គទាបនៅរដូវប្រាំង។

ទោះបីយ៉ាងណាក៏ដោយអគ្គនាយក នៃរដ្ឋាករទឹកស្វយ័តក្រុងភ្នំពេញក៏បានអះអាងដែរថា នៅចុងឆ្នាំ២០២៣ពលរដ្ឋរស់នៅរាជធានីភ្នំពេញទាំងមូលនឹងមានទឹកប្រើប្រាស់គ្រប់គ្រាន់ ខណៈចាប់ពីដើមឆ្នាំ២០២៤ទៅ រដ្ឋាករទឹកធានាថាទឹកនៅក្នុងរាជធានីភ្នំពេញនឹងលែងចោទជាបញ្ហាទៀតហើយ៕