ភ្នំពេញ៖ តែ២ ថ្ងៃប៉ុណ្ណោះបន្ទាប់ពីការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ ពោលនៅរសៀលថ្ងៃអង្គារ ទី៧ ខែមិថុនានេះ គណបក្សប្រជាជនកម្ពុជាបានកោះប្រជុំសន្និបាតគណៈកម្មាធិការកណ្ដាលវិសាមញ្ញរបស់ គណបក្សដែលគ្រោងនឹងធ្វើឡើង រយៈពេលពីរថ្ងៃនៅខែកក្កដា ខាងមុខ។
ខុទ្ទកាល័យនៃគណៈកម្មាធិការកណ្ដាលរបស់គណបក្សបានចេញសេចក្តីជូនដំណឹងដល់សមាជិក សមាជិកាគណៈកម្មាធិការកណ្ដាលទាំងអស់ អំពីការសម្រេចរបស់ គណៈអចិន្ត្រៃយន៍ គណៈកម្មាធិការកណ្តាល កោះប្រជុំនៅថ្ងៃសៅរ៍ និងអាទិត្យ ទី៩ និងទី១០ ខែកក្កដា ឆ្នាំ២០២២ (រយៈពេលពីរថ្ងៃ) នៅវិមាន៧មករា។
គួររំលឹកដែរថា ការបោះឆ្នោតជ្រើសរើសសមាជិកក្រុមប្រឹក្សាឃុំ/សង្កាត់អាណត្តិទី៥ បានធ្វើឡើងនៅថ្ងៃទី៥ ខែមិថុនា ដើម្បីជ្រើសរើសតំណែងជាសមាជិកក្រុមប្រឹក្សាឃុំ/សង្កាត់ នៅទូទាំងប្រទេសសរុបចំនួន ១១ ៦២២អាសនៈ ក្នុងចំណោមឃុំ/សង្កាត់ចំនួន ១ ៦៥២។ ពលរដ្ឋដែលចេញទៅបោះឆ្នោតក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២ មានចំនួនជិត ៧លាន ៣សែននាក់ ដែលស្មើនឹងជាង ៨០% នៃចំនួនពលរដ្ឋដែលមានសិទ្ធិបោះឆ្នោតជាង ៩លាន ២សែននាក់៕
