ភ្នំពេញ៖ ប្រធានគណៈកម្មាធិការជាតិរៀបចំការបោះឆ្នោត លោក ប្រាជ្ញ ចន្ទ បានឱ្យដឹងថារហូតមកដល់ថ្ងៃសៅរ៍ ទី៤ ខែមិថុនានេះ គ.ជ.ប បានសម្រេចទទួលស្គាល់អ្នកសង្កេតការជាតិចំនួន ៧៥ ០០០នាក់ អ្នកសង្កេតការណ៍អន្តរជាតិចំនួន ១១០នាក់ និងភ្ញៀវពិសេសចំនួន ២៣នាក់។ នេះជាការបញ្ជាក់របស់លោក ប្រាជ្ញ ចន្ទ បានប្រាប់ក្រុមអ្នកសារព័ត៌មានបន្ទាប់ពីចុះពិនិត្យទីតាំងបោះឆ្នោតនៅថ្ងៃសៅរ៍ ទី៤ ខែមិថុនានេះ។

យោងតាមរបាយការណ៍របស់ គ.ជ.ប ឱ្យដឹងថាអ្នកសង្កេតជាតិចំនួន ៧៥ ០០០នាក់នេះមកពីស្ថាប័ន អង្គការក្នុងស្រុកចំនួន ៧២សមាគមអង្គការ ខណៈអ្នកសង្កេតការណ៍អន្តរជាតិមកពីស្ថាប័នចំនួន ២០អង្គការ និងភ្ញៀវពិសេសពីស្ថានទូត និងស្ថាប័នចំនួន ៥ ពីជប៉ុន អូស្ត្រាលី និងរុស្ស៊ី។

ការបោះឆ្នោតជ្រើសរើសសមាជិកក្រុមប្រឹក្សាឃុំ/សង្កាត់អាណត្តទី៥ នឹងត្រូវធ្វើឡើងនៅថ្ងៃទី៥ ខែ មិថុនាខាងមុខ ដោយមានគណបក្សនយោបាយចំនួន ១៧ចូលរួម ដែលនឹងដណ្តើមយកកៅអីក្នុងតំណែងជាសមាជិកក្រុមប្រឹក្សាឃុំ/សង្កាត់ នៅទូទាំងប្រទេសសរុបចំនួន ១១ ៦២២កៅអី ក្នុងចំណោមឃុំ/សង្កាត់ចំនួន ១ ៦៥២ខណៈប្រជាពលរដ្ឋមានឈ្មោះក្នុងបញ្ជីបោះឆ្នោតប្រមាណជាង ៩លាន ២សែននាក់៕