អង់គ្លេស៖ កីឡដ្ឋានជាតិអង់គ្លេស Wembley នឹងត្រូវទទួលធ្វើជាម្ចាស់ផ្ទះការប្រកួតសំខាន់ៗមួយចំនួនដូចជា ការប្រកួតក្នុងពូល D ទាំង៣ នៃក្រុមជម្រើសជាតិអង់គ្លេស ការប្រកួតវគ្គ ១៦ក្រុមចុងក្រោយ ២ប្រកួត វគ្គពាក់កណ្តាលផ្តាច់ព្រ័ត្រ (Semi-Final) ព្រមទាំងវគ្គផ្តាច់ព្រ័ត្រ EURO ២០២០ នេះផងដែរ។ សម្រាប់ការប្រកួតវគ្គចែកពូលនេះ ក៏មានបើកឱ្យអ្នកគាំទ្រទស្សនាចំនួន ២ម៉ឺននាក់ក្នុងមួយប្រកួតផងដែរ។

ដោយឡែក សម្រាប់ការប្រកួតចាប់ពីវគ្គចាញ់ធ្លាក់នៃព្រឹត្តិកាណ៍បាល់ទាត់ទ្វីបអឺរ៉ុប Euro ២០២០ ខាងមុខ កីឡដ្ឋាន Wembley របស់អង់គ្លេសនឹងអាចអនុញ្ញាតអោយអ្នកគាំទ្រចូលទស្សនារហូតដល់ពាក់កណ្តាលនៃចំនួនកៅអីសរុបនៃកីឡដ្ឋានទាំងមូល ពោលគឺរហូតដល់ ៤ម៉ឺននាក់ក្នុងមួយប្រកួត បន្ទាប់ពីគំរោងនេះកំពុងស្ថិតក្នុងការពិភាក្សាររវាង សមាគមបាល់ទាត់អង់គ្លេស (FA) និងរដ្ឋាភិបាលអង់គ្លេស ហើយនិងកំពុងរុញសំណើរនេះទៅកាន់សមាគមបាល់ទាត់អឺរ៉ុប UEFA ផងដែរ។

 អង់គ្លេសនឹងបើកកីឡដ្ឋាន Wembley ទទួលភ្ញៀវក្រូអាស៊ីនៅក្នុងពូល D នៅថ្ងៃទី១៣ ខែមិថុនា វេលាម៉ោង ៨យប់ មុនបន្តជួបជាមួយស្កុតឡេន នៅវេលាម៉ោង ២ទាបភ្លឺ ឈានចូលថ្ងៃទី១៩ ខែមិថុនា និងប្រកួតចុងក្រោយប៉ះ ឆេក នៅថ្ងៃទី២៣ ខែមិថុនានេះ វេលាម៉ោង២ទាបភ្លឺ។

គួរបញ្ជាក់ថា ព្រឹត្តិការណ៍ EURO 2020 នេះ នឹងចាប់ផ្តើមប្រកួតនៅយប់នេះវេលាម៉ោង ២ទាបភ្លឺតទៅ ដោយជាជំនួបបើកឆាករវាងក្រុមជម្រើសជាតិអ៉ីតាលី ទទួលស្វាគមន៍តួកគី នៅកីឡដ្ឋាន Stadio Olimpico ទីក្រុងរ៉ូម ប្រទេសអ៉ីតាលី៕