ស្វីស៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងបញ្ហាបន្ទាប់ពីជំងឺកូវីដ-១៩ ពិភពលោកបច្ចុប្បន្នកំពុងប្រឈមនឹងបញ្ហាថ្មីមួយទៀតគឺបញ្ហាសង្គ្រាមរុស្ស៊ី-អ៊ុយក្រែន ដែលប៉ះពាល់ដល់តម្លៃប្រេងឥន្ទនៈ និងអាចបញ្ហាស្បៀងបានកើតឡើង។ ក្នុងពេលនោះសម្ដេចក៏បានចោទសួរពីតម្លៃប្រេងសាំងនៅអឺរ៉ុបផងដែរ ដែលពេលនេះមានតម្លៃ១លីត្រ ជាង២ដុល្លារអាមេរិក។ 

ពីទីក្រុង ដាវ៉ូស ប្រទេសស្វីស ក្នុងពេលជួបជាមួយពលរដ្ឋខ្មែរនៅទ្វីបអឺរ៉ុបជាង២ពាន់នាក់ នៅយប់ថ្ងៃសៅរ៍ ទី២១ ខែឧសភា សម្ដេចតេជោ ហ៊ុន សែន បានសាកសួរទៅពលរដ្ឋខ្មែរដែលរស់នៅសហភាពអឺរ៉ុបពីបច្ចុប្បន្នភាពតម្លៃសាំងនៅអឺរ៉ុបដែលត្រូវបានពលរដ្ឋនៅទីនោះឱ្យដឹងថាមានជាង២អឺរ៉ូ ឬស្មើនឹងជិត ១ម៉ឺនរៀលក្នុងមួយលីត្រ។

សម្ដេចថាមូលហេតុដែលសម្ដេចសាកសួរបែបនេះដោយសារក្នុងរដូវកាលឃោសនាបោះឆ្នោត នឹងមានអ្នកយកតម្លៃសាំងជានយោបាយរបស់ខ្លួនបន្លំប្រជាពលរដ្ឋ ខណៈដែលតម្លៃប្រេងសាំងឡើងថ្លៃស្ទើរពេញមួយពិភពលោក។

យោងតាមប្រកាសរបស់ក្រសួងពាណិជ្ជកម្មចាប់ពីថ្ងៃទី២១ ដល់ថ្ងៃទី៣១ ខែឧសភា ឆ្នាំ២០២២មានតម្លៃ ៥ ៦០០រៀលក្នុង១លីត្រសម្រាប់សាំងធម្មតា និង៥ ៤០០រៀលក្នុងមួយលីត្រសម្រាប់សាំងម៉ាស៊ូត៕