វ៉ាស៊ីនតោន៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានសំដែងនូវការរីករាយដែលកម្ពុជាគ្មានជំងឺកូវីដ-១៩ ៧ថ្ងៃជាប់ៗគ្នា ដោយថានេះគឺជាជោគជ័យនៃការប្រយុទ្ធប្រឆាំងនឹងជំងឺកូវីដ-១៩។ ទោះជាយ៉ាងណាសម្ដេចនៅតែអំពាវនាវដល់ពលរដ្ឋប្រកាន់នូវវិធានការប្រុងប្រយ័ត្នខ្ពស់ដដែល។

ក្នុងសារសំឡេងពិសេសនៅយប់ថ្ងៃទី១៣ ខែឧសភា ឆ្នាំ២០២២នេះ សម្ដេចតេជោ ហ៊ុន សែន បានបន្តអំពាវនាវដល់ពលរដ្ឋទៅទទួលវ៉ាក់សាំងការពារជំងឺកូវីដ-១៩ ឱ្យបានគ្រប់គ្នា ទាំងដូសមូលដ្ឋាន និងដូសជំរុញ ព្រមជាមួយវិធានការប្រុងប្រយ័ត្នដដែល។

សម្ដេចបញ្ជាក់ថា ក្នុងពេលជួបជាមួយប្រធានាធិបតីអាមេរិក លោក ចូ បៃឌិន កាលពីម្សិលមិញ ប្រធានាធិបតីនៃប្រទេសមហាអំណាចមួយនេះបានសន្យាផ្ដល់ជំនួយជាវ៉ាក់សាំងកូវីដ-១៩ បន្ថែមទៀតដល់កម្ពុជា និងអាស៊ាន ដែលសម្ដេចតេជោថាជាការធ្វើឱ្យវ៉ាក់សាំងរបស់កម្ពុជាមានកាន់តែច្រើនសម្រាប់ចាក់ជូនពលរដ្ឋ។

សម្ដេចតេជោថា៖ «ជាមួយវ៉ាក់សាំងដែលមានស្រាប់ និងការបន្តការផ្ដល់ជំនួយជាបន្តបន្ទាប់ពីសាធារណរដ្ឋប្រជាមាននិតចិន ពីសហរដ្ឋអាមេរិក ក៏ដូចជាប្រទេសដទៃទៀត យើងពិតជាពុំមានការខ្វះវ៉ាក់សាំងនោះទេ! ដែលខ្ញុំព្រះករុណាខ្ញុំកាលពីកន្លងទៅបានប្រកាសដាក់សិស្សនិស្សិតប្រមាណជាជិត ៤លាននាក់ចូលជាអ្នកអទិភាពក្នុងការទទួលដូសទី៤ ដូសជំរុញដូច្នេះខ្ញុំព្រះករុណាខ្ញុំ នៅតែបន្តអំពាវនាវចំពោះព្រះតេជគុណ ព្រះសង្ឃ និងជនរួមជាតិបន្តទទួលយកវ៉ាក់សាំង ហើយនេះគឺជាវ៉ាក់សាំងដើម្បីការពារខ្លួន និងការពារជាតិរបស់យើង»។

សម្ដេចបានថ្លែងអំណរគុណចំពោះជនរួមជាតិដែលចូលរួមជាមួយរដ្ឋាភិបាលប្រយុទ្ធនឹងជំងឺកូវីដ-១៩។

ពីរដ្ឋធានីវ៉ាស៊ីនតោនសម្ដេចបានផ្ដាំផ្ញើសេចក្ដីនឹងរលឹកដល់បងប្អូនជនរួមជាតិ និងសូមជូនពរដល់ជនរួមជាតិសូមមានសេចក្ដីសុខសេចក្ដីចម្រើនគ្រប់ៗគ្នា។

សម្ដេចតេជោ នឹងអញ្ជើញត្រលប់មកដល់មាតុប្រទេសវិញនៅថ្ងៃទី១៥ ខែឧសភា ឆ្នាំ២០២២ខាងមុខ៕