កំពង់ស្ពឺ៖ មន្ទីរសាធារណការ និងដឹកជញ្ជូនខេត្តកំពង់ស្ពឺបានបំភ្លឺថា ផ្លូវជាតិលេខ៤ បច្ចុប្បន្នកំពុងស្ថិតក្នុងគម្រោងជួសជុល ពង្រីកស្ដារឡើងវិញក្រោមហិរញ្ញប្បទានរបស់ធនាគារពិភពលោក ខណៈកំណាត់ផ្លូវជាតិលេខ៤១ នឹងជួសជុលនាពេលខាងមុខក្រោមគម្រោងហិរញ្ញប្បទានសហប្រតិបត្តិការពីសាធារណរដ្ឋប្រជាមានិតចិន។

ការបញ្ជាក់ពីមន្ទីរសាធារណការខេត្តកំពង់ស្ពឺនេះគឺបន្ទាប់ពីមានសារព័ត៌មានមួយបានចុះផ្សាយថា ប្រធានមន្ទីរសាធារណការខេត្តកំពង់ស្ពឺអសកម្មដែលបណ្ដោយឱ្យផ្លូវជាច្រើនខ្សែរងការខូចខាតមិនព្រមជួសជុល ពិសេសផ្លូវជាតិលេខ៤ និងផ្លូវជាតិលេខ៤១។

មន្ទីរសាធារណការខេត្តបញ្ជាក់ថា ការជួសជុលផ្លូវទាំងពីរខ្សែនេះគឺស្ថិតក្រោមគម្រោងរបស់ក្រុមហ៊ុនដេញថ្លៃ ខណៈមន្ទីរបានពិនិត្យនិងធ្វើរបាយការណ៍ទៅក្រសួងជានិច្ចពីដំណើរការនៃការជួសជុលនេះ។

ក្នុងលិខិតនោះបានបញ្ជាក់ថា៖ «ក្នុងនាមសេនាធិការរបស់ក្រសួងសាធារណការ និងដឹកជញ្ជូន និងរដ្ឋបាលខេត្តកំពង់ស្ពឺ តែងតែរាយការណ៍ជាប្រចាំជូនថ្នាក់ដឹកនាំ និងស្នើសុំបងប្អូនប្រជា ពលរដ្ឋមានការយោគយល់អធ្យាស្រ័យខ្ពស់ក្នុងអំឡុងអន្តរកាលនេះ ខណៈផ្លូវទាំងពីរខ្សែខាងលើ កំពុងត្រូវបានអនុវត្តនីតិវិធីស្តារឡើងវិញ ដើម្បីសម្រួលដល់ការធ្វើដំណើរ-ដឹកជញ្ជូនរបស់ប្រជាពលរដ្ឋ និងដឹកជញ្ជូនខេត្តកំពង់ស្ពឺ កំពុងអនុវត្ត»។

មន្ទីរសាធារណការខេត្តកំពង់ស្ពឺបញ្ជាក់ថា ក្នុងខេត្តកំពង់ស្ពឺមានផ្លូវចំនួន ៣០ខ្សែ ដែលក្នុងនោះខ្លួនបានពិនិត្យថែទាំជាប្រចាំផងដែរ៕