បាត់ដំបង៖ អាវុធហត្ថខេត្តបាត់ដំបងបានបង្ហាញមុខជនសង្ស័យចំនួន ៧នាក់ក្រោយឃាត់ខ្លួនពាក់ព័ន្ធករណីផលិត ឬធ្វើចរាចរណ៍អាវុធគ្រឿងផ្ទុះ និងគ្រាប់រំសេវគ្រប់ប្រភេទ។

ប្រភពពីអាវុធហត្ថខេត្ដបាត់ដំបងបានបញ្ជាក់ថាក្នុងចំណោមជនសង្ស័យទាំង៧នាក់ ក្នុងនោះស្រ្តី ១នាក់ ដែលត្រូវបានឃាត់ខ្លួនបានជាបន្តបន្ទាប់នៅថ្ងៃទី១ និង២ ខែឧសភា ឆ្នាំ២០២២។

ក្រោយការឃាត់ខ្លួនសមត្ថកិច្ចដកហូតបាន កាំភ្លើងខ្លី ២ដើមម៉ាក ROLO និងម៉ាក GLOCK គ្រាប់កាំភ្លើង GLOCK ចំនួន ២១គ្រាប់ និងបង់ចំនួន ២គ្រាប់ កាំភ្លើង ROLO ចំនួន ១៤គ្រាប់ គ្រាប់កាំភ្លើង AK 47 ចំនួន ១ ០០០គ្រាប់ សំបកគ្រាប់បែក ចំនួន ៥០គ្រាប់ គីបគ្រាប់បែកច្រកក្នុងកំប៉ុងចំនួន ៥កំប៉ុង ស្មើ ៥០គីប និងនៅក្រៅកំប៉ុង ចំនួន ១គីប សរុបចំនួន ៥១ គីប។ សំបកកេសដែក (បើករួច) គ្រាប់កាំភ្លើង AK47 ចំនួន ៣កេស សំបកកេសស្នោ ចំនួន ៥កេស។

ប្រភពដដែលបានបញ្ជាក់ថា ក្រោយពីឃាត់ខ្លួនជនសង្ស័យរួមជាមួយវត្ថុតាង រហូតមកដល់ពេលនេះត្រូវបានការិយាល័យជំនាញអាវុធហត្ថខេត្តកំពុងរៀបចំសំណុំរឿងដើម្បីបញ្ជូនទៅតុលាការចាត់ការតាមផ្លូវច្បាប់៕