ភ្នំពេញ៖ ប្រធានគណបក្សហ៊្វុនស៊ុនប៉ិច ព្រះអង្គម្ចាស់ នរោត្តម ចក្រាវុធ បានចាត់ទុកលោក ហ៊ុន ណេង គឺជាឥស្សរជនស្នេហាជាតិដ៏ខ្ពង់ខ្ពស់ប្រកបដោយព្រហ្មវិហារធម៌ល្អប្រពៃមួយរូបដែលបានខិតខំក្នុងការបំពេញតួនាទីជាច្រើនវិស័យជូនជាតិមាតុភូមិ ក្រោមបាវចនា ជាតិ សាសនា ព្រះមហាក្សត្រ ដោយទទួលបានលទ្ធផលគួរជាទីមោទនភាពជាតិ។

ព្រះអង្គម្ចាស់ នរោត្តម ចក្រាវុធ បានថ្លែងបែបនេះក្នុងព្រះសារចូលរួមមរណទុក្ខជូនចំពោះក្រុមគ្រួសារលោក ហ៊ុន ណេង កាលពីថ្ងៃទី៦ ខែឧសភា ឆ្នាំ២០២២។

ក្នុងព្រះសារលិខិតនោះ ព្រះអង្គម្ចាស់ បានចូលរួមសំដែងនូវសមានទុក្ខ និងការសោកស្ដាយជាមួយក្រុមគ្រួសារសព លោក ហ៊ុន ណេង និងសូមឧទ្ទិសដល់វិញ្ញាណក្ខន្ធសពលោកបានទៅសោយសុខក្នុងសុគតិភពកុំបីឃ្លៀងឃ្លាត។

គួរឱ្យដឹងផងដែរថា បងប្រុសរបស់សម្ដេចតេជោគឺលោក ហ៊ុន ណេង បានទទួលមរណភាពក្នុងជន្មាយុ ៧២ឆ្នាំ កាលពីល្ងាចម៉ោងប្រមាណ ៦និង២៥នាទី ថ្ងៃទី៥ ខែឧសភា ឆ្នាំ២០២២នេះ ដោយសារជំងឺគាំងបេះដូង។ បច្ចុប្បន្នសពរបស់លោក ហ៊ុន ណេង ត្រូវបានក្រុមគ្រួសារដាក់តម្កល់នៅគេហដ្ឋានក្នុងខេត្តកំពង់ចាម មុននឹងដង្ហែទីបញ្ចុះនៅវត្តសុវណ្ណគិរីរតនៈភ្នំប្រុស ភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាមនៅថ្ងៃទី៩ ខែឧសភា ខាងមុខ៕