ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានឱ្យដឹងថា កាលពីថ្ងៃទី២ ខែឧសភា សម្ដេចបានចុះហត្ថលេខាឱ្យរើសកងទ័ព ៣០០នាក់បន្ថែម សម្រាប់បំពេញបន្ថែមការពារអាកាស។ សម្ដេចបញ្ជាក់ថា មិនត្រូវការយន្តហោះចម្បាំងសម្រាប់បាញ់គ្នានៅលើអាកាសនោះទេ អ្វីដែលត្រូវការគឺកងទ័ពការពារអាកាសដែលសម្ដេចថាជា «សំណាញ់មេឃ»។

ថ្លែងក្នុងពិធីសំណេះសំណាល ព្រមទាំងផ្តល់រង្វាន់លើកទឹកចិត្តដល់សិស្សប្រលងជាប់និទ្ទេស A ឆ្នាំសិក្សា២០២០-២០២១ នៅសាលសន្និសីទ និងពិព័រណ៍ជ្រោយចង្វារ រាជធានីភ្នំពេញ នៅព្រឹកថ្ងៃទី៣ ខែឧសភា ឆ្នាំ២០២២នេះ សម្ដេចតេជោ បានពន្យល់ពីបន្ថែមទៀតពីយុទ្ធសាស្ត្រសំណាញ់មេឃរបស់សម្ដេច ដែលជាការពង្រឹងទ័ពការពារអាកាស មិនមែនជាការពង្រឹងទ័ពយន្តហោះចម្បាំងនោះទេ។

សម្ដេចថា៖ «កម្ពុជាអត់ចាំបាច់យកយន្តហោះទៅបាញ់គ្នាលើអាកាសទេ។ យើងត្រូវការកងទ័ពការពារអាកាសដែលហៅថា សំណាញ់មេឃ»។

នាយឧត្តមសេនីយ៍ផ្កាយ៥ផុតលេខ សម្ដេចតេជោ ហ៊ុន សែន បញ្ជាក់ថាឆ្លងតាមបទពិសោធន៍សង្គ្រាមដែលសម្ដេចធ្លាប់ឆ្លងកាត់គឺសម្ដេចបានដឹងពីចំណុចខ្សោយនៃយន្តហោះចម្បាំងច្រើនណាស់ ដែលសុទ្ធតែទ័ពការពារអាកាសអាចត្រៀមដើម្បីទប់ទល់ការវាយប្រហារបាន៕ 

^{PHOTO: EAC NEWS}