ភ្នំពេញ៖ រដ្ឋមន្ត្រីប្រតិភូអមនាយករដ្ឋមន្ត្រី លោក កៅ គឹមហួន បានឱ្យដឹងថាក្នុងការទៅចូលរួមកិច្ចប្រជុំកំពូលស្ដីពីបញ្ហាទឹកក្នុងតំបន់អាស៊ីប៉ាស៊ីហ្វិកលើកទី៤ នៅទីក្រុងគូម៉ាម៉ូតូ ប្រទេសជប៉ុន សម្ដេចតេជោ ហ៊ុន សែន រវល់ស្ទើរតែគ្មានពេលសម្រាកនោះទេដើម្បីបង្កើនទំនាក់ទំនងជាមួយប្រទេសផ្សេងៗ និងប្រាប់បរទេសពីសក្ដានុពលវិនិយោគនៅកម្ពុជា។

ថ្លែងក្នុងសន្នីសិទសារព័ត៌មាននៅរសៀលថ្ងៃទី២៤ ខែមេសា ឆ្នាំ២០២២នេះ លោក កៅ គឹមហួន បានលើកឡើងថា៖ «រាល់ទស្សនកិច្ចដែលសម្ដេចតេជោ អញ្ចើញទៅមួយលើកៗគឺលោកតែងតែគិតណាស់ក្នុងការជំរុញនូវផលប្រយោជន៍របស់ប្រទេសកម្ពុជានេះហើយការអញ្ជើញទៅប្រទេសជប៉ុនរយៈពេលខ្លីមែនប៉ុន្ដែសកម្មមែនទែន។ កម្មវិធីឡើងណែន និយាយរួមទៅសម្ដេចរកពេលសម្រាកស្ទើរមិនបានទេ»។

សម្ដេចតេជោ ហ៊ុន សែន បានធ្វើដំណើរទៅកាន់ប្រទេសជប៉ុនកាលពីថ្ងៃទី២២ ខែមេសា ឆ្នាំ២០២២ ដើម្បីចូលរួមកិច្ចប្រជុំកំពូលស្ដីពីបញ្ហាទឹកអាស៊ីប៉ាស៊ីហ្វិកលើកទី៤ នៅថ្ងៃទី២៣ ខែមេសា។ ក្នុងការចូលរួមកិច្ចប្រជុំនោះ សម្ដេចតេជោ ហ៊ុន សែន ក៏មានជំនួបជាច្រើនតាំងពីព្រឹកព្រលឹមរហូតដល់ល្ងាចថ្ងៃទី២៣ ខែមេសា ដោយសម្ដេចបានជួបពិភាក្សាការងារជាមួយនាយករដ្ឋមន្ត្រីឡាវ លោក ផនខាំ វីផាវ៉ាន់ នាយករដ្ឋមន្រ្តីជប៉ុន លោក គីស៊ីដា ហ្វឺមីអូ ចូលរួមថ្លែងក្នុងកិច្ចប្រជុំ រួមទាំងជួបជាមួយធុរកិច្ចរបស់ជប៉ុនផងដែរ។

ក្រសួងការបរទេសបានចេញសេចក្ដីប្រកាសព័ត៌មានមួយនាថ្ងៃទី២៤ ខែមេសា ដែលមានកម្រាស់៣សន្លឹកសង្ខេបពី ដំណើរទស្សនកិច្ចរបស់សម្ដេចតេជោផងដែរ ដែលក្នុងជំនួបរវាងសម្ដេចតេជោពេញមួយថ្ងៃទី២៣ គឺពោពេញដោយកិច្ចសហប្រតិបត្តិការ មិត្តភាព ការជួយគ្នា និងបង្កើននូវប្រយោជន៍ដល់ជាតិកម្ពុជាជាច្រើន រួមមាន ការសម្រេចបាននូវកិច្ចឯកសារសហប្រតិបត្តិការជប៉ុនកម្ពុជាស្ដីពីទឹក ទំនាក់ទំនងព្រំដែនកម្ពុជា-ឡាវ ទំនាក់ទំនងទ្វេរភាគីកម្ពុជា-ជប៉ុន និងកម្ពុជា-ឡាវជាដើម៕