វ៉ាស៊ីនតោន៖ ប្រធានធនាគារពិភពលោក លោក David Malpass បាននិយាយកាលពីថ្ងៃព្រហស្បតិ៍ថា ការខូចខាតហេដ្ឋារចនាសម្ព័ន្ធរូបវ័ន្តរបស់ប្រទេសអ៊ុយក្រែន ពីការឈ្លានពានរបស់រុស្ស៊ី បានកើនឡើងដល់ ៦០ពាន់លានដុល្លារ ហើយនឹងកើនឡើងបន្ថែមទៀតប្រសិនជាសង្រ្គាមនៅតែបន្ត។

លោក Malpass បានប្រាប់សន្និសីទធនាគារពិភពលោកស្តីពីតម្រូវការជំនួយហិរញ្ញវត្ថុរបស់អ៊ុយក្រែនថា៖ «ពិតណាស់សង្រ្គាមនៅតែបន្តកើតមាន ដូច្នេះការការខូចខាតនោះកំពុងកើនឡើង»។

ប្រធានាធិបតីអ៊ុយក្រែន លោក Volodymyr Zelenskiy នៅក្នុងសុន្ទរកថាតទៅកាន់សន្នីសិទមួយដោយបានគូសបញ្ជាក់ពីការចំណាយនិងតម្រូវការហិរញ្ញវត្ថុរបស់អ៊ុយក្រែន។ លោកថា អ៊ុយក្រែនត្រូវការលុយ ៧ពាន់លានដុល្លារក្នុងមួយខែ ដើម្បីទប់នឹងការខាតបង់សេដ្ឋកិច្ចដែលបណ្តាលមកពីការឈ្លានពានរបស់រុស្ស៊ីលើប្រទេសរបស់គាត់។

លោក Zelenskiy បាននិយាយថា៖ «ហើយយើងនឹងត្រូវការរាប់រយពាន់លានដុល្លារដើម្បីសាងសង់ឡើងវិញនូវអ្វីៗទាំងអស់នេះនៅពេលក្រោយ»។

លោកបានអំពាវនាវឱ្យប្រទេសដែលបានដាក់ទណ្ឌកម្ម និងបង្កកទ្រព្យសម្បត្តិរបស់រុស្ស៊ី ឱ្យប្រើប្រាស់ប្រាក់នោះ ដើម្បីជួយកសាងប្រទេសអ៊ុយក្រែនឡើងវិញបន្ទាប់ពីសង្គ្រាម ។

នាយករដ្ឋមន្ត្រីអ៊ុយក្រែន លោក Denys Shmyhal ដែលបានចូលរួមសន្និសីទដោយផ្ទាល់បាននិយាយថា GDP របស់អ៊ុយក្រែនអាចធ្លាក់ចុះពី ៣០% ទៅ ៥០% ដោយមានការខាតបង់ដោយផ្ទាល់ និងដោយប្រយោលសរុបចំនួន ៥៦០ពាន់លានដុល្លាររហូតមកដល់ពេលនេះ។

លោក Shmyhal បាននិយាយថា៖ «ប្រសិនបើយើងមិនបញ្ឈប់សង្រ្គាមនេះទេ ការខាតបង់នឹងកើនឡើងយ៉ាងខ្លាំង»៕