បន្ទាយមានជ័យ៖ នគរបាលខេត្តស្រះកែវ បានឃាត់ខ្លួនពលរដ្ឋខ្មែរ ១៧នាក់ និងមេខ្យល់ជាបុរសជនជាតិថៃម្នាក់ អាយុ ៥៣ឆ្នាំ ដែលបានលួចដឹកពលរដ្ឋខ្មែរតាមរថយន្តមួយគ្រឿងនៅបរិវេណភូមិហួយ ក្រៃតាយ ថ្នល់ទ័ពព្រិច-វ៉ាំងណាំយេន ស្រុកខ្លងហាត ខេត្តស្រះកែវ ចូលទឹកដីថៃដោយខុសច្បាប់ កាលពីវេលាម៉ោង៩យប់ ថ្ងៃទី២០ ខែមេសា ឆ្នាំ២០២២។ នេះបើតាមការចុះផ្សាយរបស់សារព័ត៌មានមួយរបស់ប្រទេសថៃ។

ក្រោយការត្រួតពិនិត្យក្នុងរថយន្ត ប្រទះឃើញពលករខ្មែរ ១៧នាក់ (ស្រី៩នាក់ ក្មេងប្រុស៣នាក់)។ ក្រោយពីសមត្ថកិច្ចថៃសួរនាំពួកគេបានសារភាពថា ពួកគេបានចំណាយលុយឱ្យមេខ្យល់នាំឆ្លងដែនក្នុងម្នាក់៥០០បាត ដោយមេខ្យល់នាំទៅស្រុកវ៉ាំង ណាំយេន បន្ទាប់មកមានអ្នកមកទទួលហើយបញ្ជូនទៅឱ្យជនជាតិខ្មែរ ដោយចំណាយលុយក្នុងម្នាក់៥០០០បាត ដើម្បីទៅធ្វើការនៅផ្សារថៃ។

ក្រោយពីសួរនាំ សមត្ថកិច្ចថៃបានបញ្ជូនពលករខ្មែរទាំងអស់ព្រមទាំងតៃកុងឡាននិងឡានទៅប្រគល់ឲ្យជំនាញដើម្បីចាត់ការតាមច្បាប់បន្ត៕