ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានចាកចេញពីប្រទេសកម្ពុជានៅព្រឹកថ្ងៃទី២២ ខែមេសា ឆ្នាំ២០២២នេះ ដើម្បីធ្វើដំណើរទៅកាន់ប្រទេសជប៉ុនចូលរួមកិច្ចប្រជុំកំពូលស្តីពីបញ្ហាទឹកតំបន់អាស៊ី-ប៉ាស៊ីហ្វិក លើកទី៤។

យន្តហោះពិសេសនៃព្រះរាជាណាចក្រកម្ពុជាបានជូនដំណើរសម្ដេចចាកចេញពីព្រលានយន្តហោះអន្តរជាតិភ្នំពេញ នៅព្រឹកថ្ងៃទី២២ ខែមេសា វេលាម៉ោងប្រមាណ ៧និង៣០នាទី។

នាយករដ្ឋមន្ត្រីកម្ពុជានឹងអញ្ជើញត្រលប់មកកម្ពុជាវិញនាថ្ងៃអាទិត្យ ទី២៤ ខែមេសា ឆ្នាំ២០២២។

កិច្ចប្រជុំកំពូលស្តីពីបញ្ហាទឹកនៅតំបន់អាស៊ី-ប៉ាស៊ីហ្វិក (APWS) លើកទី៤ ដែលប្រារព្ធធ្វើឡើងនៅទីក្រុង Kumamoto ប្រទេសជប៉ុន នឹងត្រូវធ្វើឡើង ក្រោមមូលបទ «ទឹកសម្រាប់ការអភិវឌ្ឍប្រកបដោយចីរភាព៖ ឧត្តមានុវត្តន៍ និងអ្នកបន្តវេនជំនាន់ក្រោយ» ដែលនឹងធ្វើឡើងចាប់ពីថ្ងៃទី២៣ ដល់២៤ ខែមេសា។

កិច្ចប្រជុំនេះធ្វើឡើងក្នុងគោលបំណងចែករំលែកទស្សនទាន ការប្រមើមើលទៅមុខនៃដំណោះស្រាយ និងការអនុវត្តជូនចំពោះប្រមុខរដ្ឋ ប្រមុខរដ្ឋាភិបាល ដែលគាំទ្រដល់ការសម្រេចចិត្តជាគោលនយោបាយ ក្នុងការពន្លឿនសកម្មភាពឲ្យសម្រេចបាននូវការលូតលាស់ប្រកបដោយគុណភាព ឆ្ពោះទៅកាន់សង្គមមួយដែលមានភាពធន់ ប្រកបដោយបរិយាប័ន្ន និងដោយចីរភាព ដោយដោះស្រាយនូវរាល់បញ្ហាដែលពាក់ព័ន្ធនឹងទឹក ក្រោយពេលដែលស្ថានភាពជំងឺកូវីដ-១៩ បានប្រសើរឡើងវិញ ក្នុងតំបន់អាស៊ី-បាស៊ីហ្វិក។

បន្ថែមលើនេះកិច្ចប្រជុំក៏ជំរុញកិច្ចសហការ និងភាពជាដៃគូបន្ថែមទៀត ដើម្បីប្រើប្រាស់ហេដ្ឋារចនាសម្ព័ន្ធប្រកបដោយគុណភាព ដើម្បីគាំទ្រការលូតលាស់ប្រកបដោយគុណភាព។

កិច្ចប្រជុំកំពូលស្ដីពីបញ្ហាទឹកនៅអាស៊ីប៉ាស៊ីហ្វិកលើកទី៤ (4th APWS) នឹងមានការចូលរួមពីគណៈប្រតិភូជាន់ខ្ពស់រួមទាំងប្រមុខរដ្ឋ និងអ្នកតំណាងមកពីអង្គការអន្តរជាតិក្នុងតំបន់អាស៊ីប៉ាស៊ីហ្វិកនឹងពិភាក្សាអំពីបញ្ហាផ្សេងៗទាក់ទងនឹងទឹក។

APWS ទី៤ ក៏នឹងចែករំលែកជាមួយពិភពលោកនូវកិច្ចខិតខំប្រឹងប្រែងដ៏យូរអង្វែងរបស់ទីក្រុងម្ចាស់ផ្ទះ Kumamoto ក្នុងការអភិរក្សទឹកក្រោមដី ក៏ដូចជាកិច្ចខិតខំប្រឹងប្រែងស្ដារឡើងវិញរបស់ខ្លួនពីការរញ្ជួយដី Kumamoto ឆ្នាំ២០១៦ផងដែរ៕ 

^{PHOTO: EAC NEWS}