ភ្នំពេញ៖ តម្លៃប្រេងឥន្ទនៈសម្រាប់ដាក់លក់នៅក្នុងប្រទេសកម្ពុជាពីថ្ងៃទី១១ រហូតដល់ថ្ងៃទី២០ ខែមេសា មានតម្លៃ ៥ ០៥០រៀល សម្រាប់សាំងធម្មតា និង៥ ១០០រៀលសម្រាប់ប្រេងម៉ាស៊ូត ដែលចុះចំនួន ២០០រៀលបើធៀបនឹងតម្លៃមុន។

យោងតាមការជូនដំណឹងចុះថ្ងៃទី១១ ខែមេសា ក្រសួងពាណិជ្ជកម្មពាណិជ្ជកម្មឱ្យដឹងថានេះជាការធ្លាក់ថ្លៃជាលើកទី២បន្ទាប់ពីឡើងជាបន្តបន្ទាប់ពីខែមករា ឆ្នាំ២០២២នេះមក។

បញ្ហាសង្គ្រាមរុស្ស៊ី-អ៊ុយក្រែន កំពុងធ្វើឱ្យប៉ះពាល់តម្លៃប្រេងសាំងក្នុងពិភពលោកជាខ្លាំង ខណៈដែលរុស្ស៊ីដែលជាប្រភពថាមពលពិភពលោកមួយត្រូវរងទណ្ឌកម្មជាបន្តបន្ទាប់ក្រោយពីខ្លួនលុកលុយចូលអ៊ុយក្រែន។ ក្នុងកិច្ចប្រជុំគណៈរដ្ឋមន្ត្រីកាលពីថ្ងៃទី១ ខែមេសា នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានណែនាំដល់ក្រសួងពាណិជ្ជកម្មឲ្យពិភាក្សាជាមួយនឹងក្រុមហ៊ុនឯកជនដើម្បីគ្រប់គ្រងថ្លៃលក់រាយប្រេងឥន្ធនៈ និងរៀបចំស្តុកប្រេងឥន្ធនៈជាយុទ្ធសាស្ត្រ ដោយថាសភាពការណ៍អន្តរជាតិមានការវិវត្តស្មុគស្មាញ៕