បាត់ដំបង៖ ចាប់ពីដើមខែមេសា ឆ្នាំ២០២២នេះ គេសង្កេតឃើញពលរដ្ឋខ្មែរដែលទៅធ្វើការនៅប្រទេសថៃទាំងស្របច្បាប់និងខុសច្បាប់សម្រុកនាំគ្នាវិលត្រឡប់មកស្រុកកំណើតវិញដោយភាគច្រើនឆ្លងតាមច្រកតំបន់អូរអន្លក់ ស្ថិតក្នុងភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង។

ប្រភពពីសមត្ថកិច្ចនៅតាមបន្ទាត់ព្រំដែនបានឲ្យដឹងថា ពលករខ្មែរដែលត្រឡប់មកស្រុកកំណើតនាព្រឹកនេះសរុបមានចំនួន ៤៥៥នាក់ ក្នុងនោះស្រី ១៨៦នាក់ និងក្មេង ៥៤នាក់ ត្រូវបានក្រុមគ្រូពេទ្យធ្វើតេសរហ័ស ជាលទ្ធផលអវិជ្ជមានកូវីដ-១៩ ទាំងអស់។

ដោយឡែកពលករចំនួន ១២នាក់ ស្រី ៣នាក់ កុមារ ១នាក់ត្រូវបញ្ជូនទៅធ្វើចត្តាឡីស័កនៅមណ្ឌលគីឡូ៩ ស្រុកសំពៅលូន ហើយចំពោះពលករដែលទទួលបានកាតចាក់វ៉ាក់សាំងត្រឹមត្រូវចំនួន ៤៤៣នាក់ ស្រី១៨៣នាក់ ក្មេង៥៤នាក់ ក្នុងនោះបានចាក់វ៉ាក់សាំងអោយក្មេងចាប់ពីអាយុ៥ឆ្នាំដល់១៨ឆ្នាំ ចំនួន២១នាក់ ត្រូវបានក្រុមគ្រូពេទ្យធ្វើការអប់រំណែនាំអំពីវិធានការ ការពារ ការឆ្លងជំងឺកូវី-១៩ រួចអនុញ្ញាតអោយត្រឡប់ទៅស្រុកកំណើតរៀងៗខ្លួនវិញ។

ពិធីបុណ្យចូលឆ្នាំ ប្រពៃណីជាតិខ្មែរក្នុងឆ្នាំនេះ នឹងប្រព្រឹត្តិទៅនៅថ្ងៃទី១៤ ១៥ និង១៦ ខែមេសា ឆ្នាំ២០២២ តាមទម្លាប់ពលរដ្ឋតែងត្រលប់ទៅស្រុកកំណើតជួបជុំក្រុមគ្រួសារសាច់ញាតិ និងធ្វើដំណើរកម្សាន្តនៅតាមរមណីយដ្ឋានផ្សេងៗ ខណៈដែលរដ្ឋាភិបាលសម្រេចបើកឱ្យការប្រារព្ធពិធីបុណ្យជាតិនេះឡើងវិញ បន្ទាប់ពីបានអាក់ខាន២ឆ្នាំដោយសារវិបត្តិនៃជំងឹកូវីដ-១៩៕