ព្រះសីហនុ៖ យុវជនម្នាក់ស្លាប់ និងម្នាក់ទៀតរងរបួសធ្ងន់ ក្នុងករណីគ្រោះថ្នាក់ចរាចរណ៍រវាងរថយន្ត និងម៉ូតូ ២គ្រឿង នៅវេលាម៉ោង៤និង៣០នាទីរសៀល ថ្ងៃទី៣០ ខែមីនា ឆ្នាំ២០២២ នៅលើផ្លូវជាតិលេខ៤ ម្តុំលើចំណោតអូរត្រាវ ស្ថិតក្នុងសង្កាត់១ ក្រុង/ខេត្តព្រះសីហនុ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា ករណីនេះបណ្ដាលមកពីម៉ូតូមួយគ្រឿងម៉ាក Honda Dream សេរីឆ្នាំ២០១៩ ពណ៌ខ្មៅ ពាក់ស្លាកលេខ តាកែវ 1Q-1366 វ៉ាជែងគ្នា បានរអិលចូលក្រោមរថយន្តដឹកប្រេងមួយគ្រឿង ក្រោយមកម៉ូតូខ្ទាត់ទៅគៀនក៏ប៉ះត្រូវម៉ូតូមួយគ្រឿងទៀត បណ្តាលឲ្យអ្នកបើកបរម៉ូតូរងរបួសធ្ងន់ ក្រោយមកត្រូវបានបញ្ជូនយកទៅសង្គ្រោះបន្ទាន់នៅមន្ទីរពេទ្យភ្លាមៗ។ ចំណែកយុវជនម្នាក់អ្នកបើកបរម៉ូតូ បង្កហេតុបានស្លាប់បែកក្បាល ស្លាប់នៅនិងកន្លែងកើតហេតុ។

បច្ចុប្បន្ន នគរបាលចរាចរណ៍ផ្លូវគោកខេត្តព្រះសីហនុ បានចុះវាស់វែងកន្លែងកើតហេតុ និង សម្រួលចរាចរណ៍កន្លែងកើតហេតុ រួចយកវត្ថុតាងម៉ូតូនិងរថយន្ត យកទៅរក្សាទុករងចាំធ្វើការដោះស្រាយបន្តតាមនីតិវិធី៕