ភ្នំពេញ៖ នាយករដ្ឋមន្រ្តីកម្ពុជា សម្តេចតេជោ ហ៊ុន សែន មានប្រសាសន៍ ពេលនេះ ម៉ោងនេះកម្ពុជាកំពុងកសាងហេដ្ឋារចនាសម្ព័ន្ធទូទាំងប្រទេស ខណៈប្រទេសមួយចំនួនកំពុងរងការបំផ្លាញហេដ្ឋារចនាសម្ព័ន្ធ។

សម្តេចបានថ្លែង បែបនេះនៅក្នុងពិធីសម្ពោធដាក់ឱ្យប្រើប្រាស់ជាផ្លូវការនូវស្ពានអាកាសនិងផ្លូវក្រោមដីចោមចៅថ្ងៃព្រហស្បតិ៍ ទី៣១ ខែមីនា ឆ្នាំ២០២២។

សម្តេចលើកឡើងថា ពេលនេះ បើម៉ោងនេះកម្ពុជាកំពុងកសាងហេដ្ឋារចនាសម្ព័ន្ធទូទាំងប្រទេស ខណៈអ៊ុយក្រែនកំពុងរងការបំផ្លិចបំផ្លាញហេដ្ឋារចនាសម្ព័ន្ធគ្រប់បែបយ៉ាង។

សម្តេចបានបន្តថា ចាប់ផ្តើមចេញពីសន្តិភាពដែលយើងរកបានទាំងលំបាក ២៤ឆ្នាំមកនេះ កម្ពុជាបានខិតខំប្រឹងប្រែងជាខ្លាំងដែលធ្វើឱ្យកំណើនសេដ្ឋកិច្ចកិច្ចមុនពេលមានវិបត្តិកូវីដ-១៩ កម្ពុជាមានកំណើនសេដ្ឋកិច្ចជាង ៧% ដែលធ្វើឱ្យសេដ្ឋកិច្ចរបស់ប្រជាពលរដ្ឋមានភាពល្អប្រសើរ។

សម្តេចបញ្ជាក់ថា៖ «ចឹងទេពេលមានសង្រ្គាមទើបឃើញសន្តិភាពមានតម្លៃ ខណៈកម្ពុជាមើលឃើញសន្តិភាពតាំងពីឆ្នាំ១៩៧០ មកម្លេះ [...] បើគ្មានសន្តិភាពកុំនិយាយពីការអភិវឌ្ឍន៍ កុំនិយាយពីសិទ្ធិមនុស្ស និងប្រជាធិបតេយ្យ ឡូវមើលនៅអ៊ុយក្រែនមានសិទ្ធិមនុស្សមកពីណា មនុស្សនាំគ្នារត់ចូលរូងក្រោមដីជាដើម»៕

^{PHOTO: EAC NEWS}