អន្តរជាតិ៖ កាលពីថ្ងៃអង្គារ ទី២៩ ខែមីនា តារាចម្រៀងជាច្រើនរូបបានសម្តែងការប្រគុំតន្ត្រីក្នុងគោលបំណងរៃអង្គាសថវិកាសម្រាប់ការងារមនុស្សធម៌របស់គណៈកម្មាធិការគ្រោះមហន្តរាយសម្រាប់ជួយដល់ប្រទេសអ៊ុយក្រែន។

ការប្រគុំតន្ត្រីរយៈពេលពីរម៉ោងបានធ្វើឡើងនៅក្នុងទីក្រុង Birmingham របស់ចក្រភពអង់គ្លេស ដោយមានការចូលរួមពីតារាចម្រៀងដូចជា Ed Sheeran និង Camila Cabello។ ក្រៅពីនេះនៅក្នុងការប្រគុំតន្ត្រីនេះគេឃើញមានវត្តមាន តារាចម្រៀង Snow Patrol, Emeli Sande, Tom Odell, Manic Street Preachers, Anne Marie, Becky Hill, The Kingdom Choir, Gregory Porter, Paloma Faith និង Nile Rodgers & Chic។

តារាចម្រៀងម្ចាស់បទ Shape of You លោក Ed Sheeranបានលើកឡើងថា៖ «ខ្ញុំមានកិត្តិយសណាស់ដែលបានមកទីនេះ»។

ដោយឡែកតារាចម្រៀងមួយរូបទៀតនាង Camilla Cabello បាននិយាយថា៖ «យើងទាំងអស់គ្នាកំពុងបន់ស្រន់សូមឱ្យមានសន្តិភាព និងសុវត្ថិភាពរបស់ប្រជាជនក្នុងប្រទេសអ៊ុយក្រែន។ សូមអរគុណអ្នកខ្លាំងណាស់អ្នកទាំងអស់គ្នាសម្រាប់ការជាផ្នែកមួយនៃសកម្មភាពនេះ»។

អ្នករៀបចំកម្មវិធីបាននិយាយថា ការប្រគុំតន្ត្រីនេះបានរៃអង្គាសប្រាក់ ១៦លានដុល្លារដើម្បីជួយអ៊ុយក្រែន៕