អាស៊ាន៖ សហព័ន្ធបាល់ទាត់អាស៊ាន ហៅកាត់ថា AFF ធ្លាប់បានប្រកាសកាលពីឆ្នាំំ ២០២០ កន្លងទៅថា ព្រឹត្តិការណ៍បាល់ទាត់តំបន់អាស៊ីអាគ្នេយ៍ AFF Suzuki Cup 2020 នឹងធ្វើឡើងនៅថ្ងៃទី០៥ ខែធ្នូ ឆ្នាំ២០២១ ដល់ថ្ងៃទី០១ ខែមករា ឆ្នាំ២០២២ បន្ទាប់ពីការប្រកួតនេះ ត្រូវបានរំខាន និងលើកពេលប្រកួតជាបន្តបន្ទាប់ដោយសារជំងឺកូវីដ-១៩។

ដោយឡែក កាលពីពេលថ្មីៗនេះ សហព័ន្ធបាល់ទាត់អាស៊ាន បានធ្វើការប្រកាសជាផ្លូវការអំពីកាលបរិច្ឆេទក្នុងការចាប់ឆ្នោតបែងចែកពូលនៃពានរង្វាន់នេះ នឹងត្រូវឡើងនៅថ្ងៃអង្គារ៍ ទី១០ ខែសីហា ឆ្នាំ២០២១។ ប៉ុន្តែយ៉ាងណាក្តី ចំពោះទីកន្លែងសម្រាប់ពិធីចាប់ឆ្នោត រួមទាំងរូបមន្តប្រកួតនូវមិនទាន់មានការបញ្ជាក់ច្បាស់លាស់នៅឡើយទេ។

យោងតាមប្រសាសន៍របស់លោក ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា និងជាប្រធានសហព័ន្ធកីឡាបាល់ទាត់អាស៊ាន (AFF) លើកឡើងថា «យើងពិតជាមានសេចក្តីសោមនស្សរីករាយ សូមប្រកាសកាលបរិច្ឆេទនៃការចាប់ឆ្នោតចែកពូលជាផ្លូវការសម្រាប់ការប្រកួតឆ្នាំនេះ។  AFF នូវតែរក្សាគោលបំណងក្នុងការរៀបចំការប្រកួតក្រោមរូបមន្តពេញលេញមួយ និងមានកាលវិភាគរបស់ខ្លួន រួមទាំងការប្រកួតជាលក្ខណៈក្នុងដី (Home) និងក្រៅដី (Away) នៅគ្រប់ដំណាក់កាលនៃការប្រកួត។ ប៉ុន្តែយើងក៏ទទួលស្គាល់នូវតម្រូវការនៃការស្រាវជ្រាវ និងត្រៀមសម្រាប់ផលប៉ះពាល់ការរាតត្បាតនៃជំងឺកូវីដ-១៩ ដែលអាចរាប់បញ្ចូលនៃជម្រើសរូបមន្តផ្សេងទៀត ការប្រើប្រាស់ទឹកដីកណ្តាល (Centralized Venues) រួមមួយសម្រាប់ព្រឹត្តិការណ៍នេះ»៕